ភ្នំពេញ៖ ប្រធានអតីតបក្សសង្គ្រោះជាតិលោក កឹម សុខា បានប្រកាសថា អ្វីដែលលោកធ្វើគឺធ្វើទៅបានតាមកាលៈទេសៈ និងឆន្ទៈរបស់លោកគ្មានរងការបង្ខិតបង្ខំឬគំរាមពីអ្នកណានោះទេ។ ការបញ្ជាក់របស់លោកនាពេលនេះគឺជាឆ្លើយតបទៅនឹងការលើកឡើងរបស់ទណ្ឌិត សម រង្ស៉ី ដែលថាការប្រកាសរបស់លោក កឹម សុខា ផ្ដាច់ចំណងជាមួយ សម រង្ស៉ី កើតចេញពីការគំរាមកំហែងរបស់សម្ដេចតេជោ ហ៊ុន សែន។

នៅព្រឹកថ្ងៃទី១ ខែធ្នូ ឆ្នាំ២០២១នេះ លោក កឹម សុខា បានសរសេរថា៖ «ថ្ងៃទី០១ ខែធ្នូ ឆ្នាំ២០២១ ខ្ញុំធ្វើអ្វីដែលខ្ញុំអាចធ្វើបានទៅតាមលទ្ធភាពកាលៈទេសៈ និងដោយឆន្ទៈពិតរបស់ខ្ញុំ មិនធ្វើតាមអ្នកណាគំរាមបង្ខំខ្ញុំឡើយ ជាពិសេសអ្វីដែលខ្ញុំផ្សព្វផ្សាយក្នុងផេកផ្លូវការរបស់ខ្ញុំ» ។

លោកសរសេរបែបនេះដោយអមជាមួយរូបភាពជាច្រើនសន្លឹកដែលជាសកម្មភាពរបស់លោកក្នុងខែវិច្ឆិកាកន្លងទៅ។

ក្រោយការបោះឆ្នោតជ្រើសរើសក្រុមប្រឹក្សាឃុំសង្កាត់កាល ពី ឆ្នាំ២០១២ គណបក្សសមរង្ស៊ីដែលដឹកនាំដោយលោក សម រង្ស៊ី និងគណបក្សសិទ្ធិមនុស្សដែលដឹកនាំដោយលោក កឹម សុខា បានច្របាច់បញ្ជូលគ្នាបង្កើតជាគណបក្សសង្គ្រោះជាតិដើម្បីចូលរួមការបោះឆ្នោតជ្រើសរើសសមាជិកសភាឆ្នាំ២០១៣។

ទោះជាយ៉ាងណា កាលពីថ្ងៃទី២៨ ខែវិច្ឆិកា ឆ្នាំ២០២១ លោក កឹម សុខា ចេញមុខមកបញ្ជាក់ថាលោកលែងជាប់ពាក់ព័ន្ធនឹង សម រង្ស៉ី ទៀតហើយ និងអំពាវនាវឲ្យ សម រង្ស៊ី និងបក្ខពួកឈប់យកឈ្មោះលោកទៅភ្ជាប់នឹង សម រង្ស៉ី ថែមទៀត។

លោក កឹម សុខា បានសរសេរលើហ្វេសបុកផេករបស់លោកថា សម រង្ស៊ី និងបក្ខពួកបានយកឈ្មោះលោក ទៅភ្ជាប់ជាមួយនឹងសកម្មភាពនយោបាយនានារបស់ សម រង្ស៊ី ដោយពុំមានការអនុញ្ញាតពីលោក។ លោកបន្ថែមថា លោក សម រង្ស៉ី បានដើរចេញពីចំណងទំនាក់ទំនងនិងស្មារតីដើមនៃការរួបរួមទៅបង្កើតចលនានយោបាយផ្សេងៗ និងមុខតំណែងខ្លួនឯង ថែមទាំងបានគាំទ្រអតីតគណបក្សភ្លើងទៀនដែលជាបក្សចាស់របស់ខ្លួនថែមទៀត ដោយថាជាទង្វើដែលសបញ្ជាក់ថា សម រង្ស៊ី កឹម សុខា មិនមែនជាមនុស្សតែមួយទេ ដោយសារតែសកម្មភាពទាំងអស់នេះមិនបានចេញពីគំនិតរបស់លោក កឹម សុខា ឡើយ។

កាលពីម្សិលមិញ កូនស្រីពៅរបស់លោក កឹម សុខា កញ្ញា កឹម សុមាធីតា បានសរសេរនៅលើបណ្ដាញសង្គម twitter របស់ខ្លួន ប្រកាសច្រានចោលព័ត៌មានទាំងឡាយដែលលាបព័ណ៌មកលើក្រុមគ្រួសារកញ្ញា និងថាក្រុមគ្រួសារកញ្ញាបានរងគ្រោះព្រោះការលាបព័ណ៌របស់ សម រង្ស៊ី និងបក្ខពួកអស់ជាច្រើនឆ្នាំមកហើយផងដែរ។

ក្នុងសារលើ Twitter កឹម សុមាធីតា បានលើកឡើងថា ចាប់តាំងពីឪពុកកញ្ញាត្រូវបានចាប់ខ្លួន សម រង្ស៊ី និងគូកនបានចាប់ផ្ដើមយុទ្ធនាការលាបព័ណ៌មកលើឪពុករបស់កញ្ញា និងព្យាយាមបំបិតមាត់ដៃគូររបស់ខ្លួនថែមទៀត។ កញ្ញាចាត់ទុកថាសកម្មភាពរបស់ សម រង្ស៊ី និងបក្ខពួកថា ជាសកម្មភាពជនផ្ដាច់ការ និងប្រើប្រាស់ឧបករណ៍បំពងសំឡេងដែលលំអៀងរបស់ខ្លួនផ្សព្វផ្សាយបំផ្លាញអ្នកដទៃ៕